This website is frozen and will not be updated more.
From now on the new information will be published at ikusimakusi.eus.

2015/12/31

Tag Archives: Software Askea

Instalazio jaia Udondo gaztetxean

2009(e)ko uztailak 10 13:30 / 3 iruzkin / Txopi

kartela
Irudi originala

Aurrekoan software askearen sarrera bat egin genuen Udondo gaztetxean. Datorren igandean, nahi duenari bere ordenagailuan sistema eragile libre bat instalatzen lagunduko diogu.

Debianera, Ubuntura, FreeBSDra pasatu nahi zara baina badaezpada ez duzu zuk bakarrik egin nahi? Ba zatoz Udondo gaztetxera, gustora lagunduko zaitugu eta

GISA elkarteko Maider etorriko da eta install party-etan esperientzia dexente dauka. Debianeko main paketeen ispilua ekarriko du, baina norbaitek beste distribuzioren bat instalatu nahi badu ekarri ditzala nahi dituen CD/DVDak. Proiektore bitartez ordenagailu batetan Debian instalatuko dugu, urrats guztiak banan-banan azalduz. Denon artean jendearen zalantza guztiak argitzen saiatuko gara, gaztetxera datozen guztiek sistema eragile askea beraien ordenagailuan martxan eraman dezaten.

Portzierto, nahi duenak hemen dauzka kartelaren iturri fitxategiak (nirea ez den portatilaren irudia kenduta, beste guztia ohi bezala jabetza publikoan uzten dut):

instalazio-jaia-udondon.tar.gz (302 KB)

Beste hizkuntzak: castellano

/ Etiketatua: gnu/linux, jaia, software askea, tailerra, udondo

Librezale taldea

2009(e)ko apirilak 6 19:25 / 2 iruzkin / Txopi

librezale 3d
Irudi originala

Librezale taldea ez da elkarte bat, euskara maite duten software libre erabiltzaileen talde bat baizik. Helburua, Aitorren hizkuntz zaharra erabiliz teknologia berriekin lan egin ahal izatea da. Eta horretarako, tresnak, hau da programak, euskaraz erabili ahal izatea ezinbestekoa da. Beste hizkuntza batzurekin alderatuz gure hizkuntzak duen hiztun kopurua ikusita, software jabeduna garatzen duten enpresa askok (Microsoftek adibidez, beste askok eta askok bezala) euskara albo batera usten dute. Norbaitek diru dexente eman ezean (Eusko Jaurlaritzak egin ohi duen bezala), atzerriko enpresa horiek ez dute beraien programa bat bera ere euskarara itzultzen. Librezale taldeak, software libreak ematen dituen aukerak ezaguturik, nahiz eta oso baliabide urriak izan, software librea motako programak euskaratzen ditu.

Librezale taldea ez da elkarte bat, euskara maite duten software libre erabiltzaileen talde bat baizik

Programa mota hauek elkarlanean oinarrituta daudenez, moldatuak eta hobetuak izateko laguntza guztiak ematen dituzte, baita euskaratuak izateko ere. Eta horri esker, bai Librezaleren bai beste hainbat boluntarioren lanari esker, gero eta programa gehiago erabil ditzakegu euskaraz: Firefox nabigatzailea, Thunderbird posta-e bezeroa, WordPress blog kudeatzailea, OpenOffice pakete ofimatikoa, GIMP irudi editorea, Azureus P2P sareen bezeroa (orain Vuze deitzen dena), Debian GNU/Linux sistema eragilea, Mailman posta zerrenden kudeatzailea, Facebook webgunea, eta abar luze bat. Programa guzti hauek, libreak izateaz gain (edonork lagun dezake garapenean, frogak egiten, itzulpenak egiten), dohakoak dira eta estandarrak betetzen dituzte. Jabedun softwareek tamalez oso gutxitan egiten dute hau.

Beraz, Librezalek software librearen baloreak eta lan erak bereak egiten ditu, euskaraz dakien edonork programak euskaratzen lagundu dezakeelarik. Horretarako, taldearen webgunera joan eta posta zerrendan izena eman besterik ez da egin behar. Bertan, euskaltzale oso ezberdinek hartzen dute parte (ikasleak, tabernariak, filologoak, idazleak, informatikariak, etab.), baina guztiak batzen dituen helburu bati esker elkarlanean: gure hizkuntza maitea teknologia berrietan normaltasun osoz mugitu dadin laguntzea.

Sorrera

Librezale taldea, informatikari euskaltzale batzuek sortu zuten orain dela sei urte inguru. Lagun hauek, software librea motako programa batzuk erabiltzen zituzten (Mozilla familiakoak) eta programa mota hauek norberak programa bera aldatzea, hobetzea eta gogoko hizkuntzara itzultzea ahalbidetzen duenez, horrela egin zuten. Eta lortutako emaitzak euskal erabiltzaile guztiei eskaini zizkieten.

Lan asko egiteko zegoela ikusita, lagun talde txiki honek Euskal Herrian zehar sakabanatuta zeuden software libreko programen erabiltzaile guztiei indarrak batzeko deia egin zieten eta horrela sortu zen Librezale taldea. Ordundik hona taldea asko hazi eta indartu da.

Librezale gaur

Instalatzeko prest dagoen programa euskaratua, normalean, programaren webgunean argitaratzen da, inork euskaraketa bakarrik nahi izatekotan Librezaleko webgunean lortu dezakeelarik

Gaur egun, 60 pertsona inguru dira aktiboenak, webguneko foroan 260 pertsona izena emanda badaude ere. Interneti esker, taldeko kideak beraien etxeetatik elkarlanean aritzen dira eta programen bertsio berriak kaleratzen direnean, programa bakoitzean interesa duten Librezaleko kide multzo batek euskaraketa egiten du. Instalatzeko prest dagoen programa euskaratua, normalean, programaren webgunean argitaratzen da, inork euskaraketa bakarrik nahi izatekotan Librezaleko webgunean lortu dezakeelarik.

Orain dela aste gutxi kaleratu den WordPress programaren azken bertsioan adibidez, hamar pertsona inguruk hartu zuten parte euskaraketan. Baten batek ezagutza teknikoak izatea ezinbestekoa izaten da, baina Librezalek erabiltzen duen Pootle programari esker, nabigatzaile bat erabiltzen jakitea nahiko da euskaraketetan laguntzeko. Hori gutxi balitz, Durangoko Azoka ospatzen zela aprobetxatuz Librezaleko kideek burutu zuten azken bileran, euskaraketen kalitatea bermatzeko estilo-liburu bat sortzea erabaki zuten eta horretan diardute.

Euskaldunok, euskaraz dabiltzan aplikazio gehiago ditugu aukeran eta horrek zalantzarik gabe gure hizkuntzaren normalkuntzan laguntzen du

Gutxi-gutxika, euskaldunok, euskaraz dabiltzan aplikazio gehiago ditugu aukeran eta horrek zalantzarik gabe gure hizkuntzaren normalkuntzan laguntzen du. Agian horregatik, ospatu berri diren ARGIA Sarietan Librezalek Interneteko saria irabazi du. Bejondeiela!

Librezalek, software librearen filosofia jarraituz euskaldunok erabiltzen ditugun programa libreak euskaratzea bide egokia dela erakutsi du

Librezalek, software librearen filosofia jarraituz euskaldunok erabiltzen ditugun programa libreak euskaratzea bide egokia dela erakutsi du. Baina oraindik badira euskaldunok erabiltzen ditugun jabedun software guztietatik bakan batzuk euskaratuz nahiko dela uste dutenak. Nire uste apalean, Librezalek eta beste euskaltzale batzuk hartu duten bidea, software librearena, teknologia berrietan gure hizkuntza txikiaren normalkuntza lortzeko bide bakarra da. Euskaldunok erabiltzen ditugun jabedun softwareak euskaratzeari ekitea, gure burua engainatzea da, irteerarik ez duten kaleetan gure dirua eta gure denbora xahutzea da.

librezale

Kale itxiak

Orain dela urte dexente, Librezaleko partaidetako batek, berak hain gogoko zuen Apple enpresa ezaguneko MacOS X sistema eragilearen interfasea (erabiltzaileak ikusten duena) euskaratzea erabaki zuen, eta hain lan handia hartu ondoren, Apple-en erreakzioa ez zen eskerrak ematekoa izan, ezta gutxiago ere, programa hori jabeduna zela esateko baizik eta euskarazko itzulpen hori inortxori ere ezin ziola eman mehatxu egiteko baizik.

Eusko Jaurlaritzak orain dela urte batzuk teknologia berrietan euskara sustatzeko egin zuen apustua gogoz berreskuratzea nahiko nuke nik eta behingoz software librearen aldeko apustua egitea

Eusko Jaurlaritzak ere dirutza ederra eman zion Microsoft enpresari Windows 95 eta Word 6.0 euskaratzen utzi ziezaion eta, behin lortutakoan, Microsoftek bere produktuen hurrengo bertsioak kaleratu zituenean egindako lan guztia galdu egin zen. Eusko Jaurlaritza orain Microsoftekin askoz hobeto eramaten da eta euskal administrazio publikoko ordenagailu guztientzako bere produktuen lizentzietan urtero ordaintzen duen dirutza izugarriaz aparte, igaz adibidez, euskal enpresek software librearekin egin zezaketen proiektua Microsofti egiteko ordaindu zioten, 20 miloi euro mandogatik.

Hain bezero fidela ikusita edo, Microsoftek bueltan, inork erabili nahi ez duen Windows Vista sistema eragilea musutruk euskaratzea erabaki du antza. Eta Eusko Jaurlaritzak, bere fideltasunaren seinale, Ukan sarietan, Microsoft enpresaren ekintza “altruista” hori aipamen berezi batekin eskertu du. Sinestezina…

Eusko Jaurlaritzak orain dela urte batzuk teknologia berrietan euskara sustatzeko egin zuen apustua gogoz berreskuratzea nahiko nuke nik eta behingoz software librearen aldeko apustua egitea. Librezalek eta euskal gizartearen gero eta portzentai handiagoak egiten duen bezala.

Etorkizuna

Edozein kasutan, denbora aurrera doa eta Librezaleko partaideak ilusioz gainezka eta lan egiteko gogoekin jarraitzen dute. Gaur egun mantentzen dituzten programak euskaratuta mantentzeaz gain, webgunean dauden laguntza foroak ere mantentzen dituzte. Lehen aipatutako estilo-liburua ere abian da eta artikulu hau argitaratzen den egunean, Librezaleko partaide batzuk, FOSDEM bilkuran parte hartzen egongo dira. Bilkura hau Europar mailan ospatzen den software libreko garatzaileen handiena da eta gonbidapen bat jaso ondoren, taldeko batzuk gonbidapena onartu eta Bruselara joatea erabaki zuten. Nork daki handik ideia berriekin etorriko diren. Lagun gehiagorekin ziur baietz!

Bere sorreratik Librezalek software librearekin izan duen erlazioaz haratago, orain dela aste batzuk taldera gehitu den euskal idazle bat ere lagundu ahal izan dute. Joakin Balentzia idazleak “Egunetako aparra” izeneko poesia-liburua Interneten argitaratu nahi zuen eta Librezaleri laguntza eskatu zion hori ondo egiteko. Azkenean, liburua Librezaleko webgunean argitaratu da Creative Commons Aitortu-Partekatu berdin 3.0 lizentziarekin. Nork daki etorkizunean talde honek software librea euskaratzeaz gain, era guztietako eduki libreak euskaratzen edo/eta sortzen lagunduko duen.

Hala ere, euskaldunok erabiltzen ditugun programa libreak euskaratzen bakarrik, oraindik nahiko lan dago aurretik baina!

Argitaraketa: Artikulu hau GARA egunkariko GAUR8 larunbateko gehigarrirako prestatu dut eta 2009ko otsailaren 7an argitaratu da.

Informazio gehiago:

/ Etiketatua: euskara, gara, gaur8, librezale, software askea

Software askea Udondo gaztetxean

2009(e)ko martxoak 23 1:13 / 3 iruzkin / Txopi

Irudi originala: educastur (CC BY-NC-SA 2.5)

Orain dela aste batzuk eskari/proposamen bat bota nuen posta zerrenda batzuetan ea nork nahi zuen Udondo gaztetxean GNU/Linuxeko tailer praktiko bat eman. Pisoni-k, jaXvi-k eta Unai Martinezek erantzun zuten eta lauron artea, asteazken honetan, gaztetxeko kideentzako gauza praktiko bat antolatu dugu.

Martxoak 25, arratsaldeko 19:00etarako egitaraua:

Aurkezpena (20 minutu)
Programa askeen azalpenak (5-10 minutukoak):
- GNOME, ingurune grafikoa.
- Firefox, Interneten nabigatzeko.
- Pidgin, Jabber eta MSN bidez txateatzeko.
- OpenOffice Writer, testuak idazteko.
- GIMP eta InkScape, kartelak egiteko eta argazkiak editatzeko.
- Amarok eta VLC, musika eta bideoak entzun eta ikusteko.
- KDEnlive eta Audacity, bideoak editatzeko.
- k3b, CD eta DVDak grabatzeko.
- Synaptic, programak instalatzeko.

Aurkezpena jaXvik egingo du, baina nik dakidala oraindik ez du materiala inon argitaratu. Seguraski, pisonik beste ekitaldi baterako prestatu zuen txuleta honen kopiak banatuko ditugu.

Ekitaldia guztiz irekia da. Bertatik pasatu besterik ez duzu egin behar. Litekeena da datorren jendearekin (gutxienez gaztetxekoekin, lehen egiten zuten bezala software askea berriro erabili nahi bait dute) tailer honen ondoren GNU/Linux instalazio jai bat antolatzea. Software askea nola erabili ikasteko gogoekin bazabiltza, ez izan zalantzarik eta zatoz!

Informazio gehiago:

Erlaziodun artikuluak:

Software askea Barakaldon

Beste hizkuntzak: castellano

/ Etiketatua: gnu/linux, software askea, tailerra, udondo

Software askea Barakaldon

2008(e)ko abenduak 17 1:06 / / Txopi

Pasa den astean hitzalditxo bat eman nuen Barakaldoko Arrano tabernan. Ubuntu 8.10 distribuzioaren hamar bat kopia eraman nituen eta gerturatu zirenen artean banatu nituen. Hitzaldia eman aurretik, jendea ez aspertzeko sistema eragilearen ingurugiroa gainetik erakutsi nuen (Gnomeko menuak, kalkulagailua, jokoak, eta abar.). Txapa eman aurretik, azalduko nuena erabilgarria izango zela argi geratu zedin

Aurkezpenaren ondoren OpenOfficeko Writer aplikazioa, GIMP irudi editorea, Firefox nabigatzailea eta Synaptik pakete kudeatzailea zertarako diren eta oso gainetik nola dabiltzan azaldu nuen. Egin daitezkeen gauza guztiak ikusita, jendea nahiko pozik eta animatuta ikusi nuen. Eman nien CDa live eran behintzat beraien etxeko ordenagailuetan frogatzeko gogoarekin

Gero, galdera asko egin zituzten eta denon artean elkarrizketan aritu ginen. Galderaren bat edo beste gak erantzun zuen, niri laguntzera hitzaldira etorri bait zen. Partaideak pozik ikusi nituen eta batek baino gehiagok GNU/Linux beraien etxeko ordenagailuan nola instalatu jakin nahi zuten. Beraz, hitzaldi honen helburua lortu nuelakoan nago!

Hona hemen erabili nuen aurkezpena:

20081211SoftwareAskea.pdf (1,4 MB)

20081211SoftwareAskea.odp (2,4 MB)

Beste hizkuntzak: castellano

/ Etiketatua: barakaldo, formatu askeak, hitzaldia, software askea

Tag Archives: Software Askea

Instalazio jaia Udondo gaztetxean