Tag Archives: Politika

Giza eraikuntza era berriak

2011(e)ko martxoak 12 19:05 / / Txopi

Atzeratutako materialarekin nator. Aurkezpen hau, 2009an Mexikoko EDUSOL jardunaldietan eman nuen hitzaldi batekoa da. Mintegian parte hartu ondoren, prestatzen ari nintzen artikuluari buruzko hitzaldi bat ematea proposatu zidaten eta hala egin nuen. Laster, lankidetzan garatu genituen artikuluak batzen dituen liburua argitaratuko da, beraz, liburuak argia ikusten duenean, nik idatzitako testua argitaratuko dut hemen.

Konferentziaren bideoa (128 minutu) EDUSOLen gunean eskuragarri dago eta erabili nuen aurkezpena hau da:

20091119Politica2.0.pdf (1,9 MB)

20091119Politica2.0.odp (2,5 MB)

Beste hitzkuntzak: castellano

/ Etiketatua: hitzaldia, mexiko, politika, politika 2.0

Krisi garaian software librea!

2010(e)ko apirilak 3 20:29 / / Txopi

Orain inoiz baino gehiago.

free software
Irudi originala

Jakina denez, krisi ekonomiko batean murgilduta gaude. Oso zaila da krisi horren zergatiak eta nondik norakoak zehatz marraztea, baina, orokorrean, badago adostasuna egungo eredu ekonomikoko agenteen berekoikeriari errua botatzeko. Bankuak, multinazionalak eta oro har enpresa kapitalistenak dira krisi hau sortu dutenak. Etekin ekonomikoak bakarrik axola zaizkie eta ez pertsonen (langileen) eskubideak. Onura ekonomikoetatik at ez dute beste ezertxo ere ikusten eta horregatik gobernuek arautegien bitartez, enpresek egin ditzaketen gehiegikeria guztiak aurreikusten eta mugatzen saiatzen dira. Nire ustez, alperrik.

Krisi honen ondorioetako bat gizartearentzako hain kaltegarriak izan daitezkeen enpresa horiek gertuagotik jarraitzea da, lotuagoak edukitzea, beraien gose aseezinaren ondorioak denon artean ordaindu ez ditzagun. Neoliberalismoaren alde gogorra norbere etxean ezagutu ondoren, asko eta asko konturatu dira edo, inoiz baino argiago geratu zaie, azken mendeetan landu dugun eredu ekonomikoak, hau da, kapitalismoak, kale itsu batera besterik ez garamatzala.

Azken hilabeteetan, dezente hitz egin da gure sistema ekonomikoaren etika ezak suposatzen duen larritasunari buruz: krisia ekonomikoa baino, etikoa dela. Ezkorrenek (edo baikorrenak, begiratzen den ikuspuntuaren arabera), munduko burtsen ezegonkortasunaren aurrean estatuek egin zituzten mugimenduak ikusita, kapitalismo berri baten atarian geundela pentsatu zuten. Baina dagoeneko argi geratu da hartu diren erabakiak sistema berriz egonkortzeko hartu direla, ez sistema eraldatzeko.

Naiz eta beste mundu berri bat posiblea izan, nahiz eta beharrezkoa izan, krisi honen ondoren okerreko bidean jarraituko dugula iruditzen zait niri. Eta gure sistema ekonomikoko norabide oker hau zuzentzen saiatzeko egin daitezkeen gauzetako bat, nire ustez, software librea bultzatzea da.alemaniar armada gelditzerik lortuko.

Software librearen alde

Software libreak, jabedun softwareak ez bezala, motibazio etikoak ditu. Jabedun software gehiena garatzen duten enpresa multinazionalei, pertsonak (erabiltzaileak) bost axola zaizkie. Bilatzen duten bakarra etekin ekonomikorik handienak lortzea da. Zentzu horretan, beste edozein sektoretako enpresa kapitalistak bezala aritzen dira.

Software librearen kasuan, emaitza askea izatea eta bere inguruan bildutako jendearentzat ekarpen bat izatea da helburua. Eta helburu hori, softwaregintzaren mundua gertutik ezagutzen ez dutenentzat batzuetan ulertzen zaila bada ere, ikuspuntu ekonomikotik ere baliagarria da. Logika ez da jendea ala etekinak, baizik eta jendea eta etekinak. Software librearen iraultza, iraultza lasaia dela esan dezakegu, dagoeneko mundu osoko softwaregintza gehiena eraldatu badu ere, oso gatazka gutxi eragin baititu. Honetatik nolabaiteko ikaskizuna ateratzea gustatuko litzaidake, beste esparru batzuetan aplikatu ahal izateko.

Esan bezala, software librearen ezaugarriek oso onura etiko garrantzitsu batzuk bermatzen dituzte eta egungo krisi etikoa ikusirik, ezaugarri horiek inoiz baino pisu gehiago izan behar dute. Software librearen lehen ezaugarria, adibidez, norbanakoaren askatasuna indartzea da. Bigarrena, zientziaren eta hezkuntzaren aurrerakuntzan laguntzea. Software librearen hirugarren zutabea jendearen (edo enpresen) arteko elkartasuna bultzatzea da, eta hainbat adibidek erakusten duten bezala, baita elkartasun hori lortu ere. Bukatzeko, laugarren askatasun edo ezaugarria kooperazioan lan egitea eragitea da, hau da, software librea garatu eta erabiltzen duten enpresek eta pertsonek komunitate bat eratzea eragiten du.

Lehen momentuan pertsona eta enpresa askori software librearen abantaila teknikoak eta onura ekonomikoak bakarrik axola bazaizkie ere, mundu hau gertutik ezagututakoan, aipatutako onura etikoak (norbanakoaren askatasuna, zientzia eta hezkuntzaren aurrerakuntza, elkartasuna, kooperazioa, komunitatea) bizi egiten dituzte eta software librea eta estandar irekiak erabiliz lehen baino onura gehiago jasotzen dituztela ulertzen dute.

Beste ezeren gainetik, software librearen meriturik handiena hori izan liteke: gatazka askorik sortu gabe, gutxi-gutxika zabaltzen eta indartzen joan dela. Ez hori bakarrik, copyleft softwarearen baliokideak beste esparru batzuetan ere sortu dira: copyleft musika, literatura, kazetaritza, politika, eta abar. Gehienok konturatu orduko, software libreak hasitako olatuaren onurak gure gizartean zabaltzen doaz.

Beraz, lehendik ere software librea sustatzeko eta erabiltzeko arrazoi dezente bageneuzkan, egungo krisia ikusita, orain da garaia, inoiz baino gehiago, software librearen aldeko apustu garbia eta sendoa egiteko.

Pertsona batzuentzat softwarez aldatzea ez da lan erraza, baina Euskal Herriko gero eta enpresa gehiago beraien kabuz esfortzua egiten ari badira, erakunde publikoek ez dute aitzakiarik. Europar Batasunak aspaldi egin zuen software librearen eta estandar irekien alde eta Europako txoko askotan abantaila nabarmena hartu digute gai honetan (Andaluzian, Italian, Frantzian, Alemanian, Finlandian eta abar). Eusko Jaurlaritzak egin du software librearen alde gauzatxoren bat edo beste, baina heldu da garaia behingoz gai hau serio har dezan. Eta pairatzen ari garen krisi ekonomikoari aurre egiteko tresna baliagarri bat dela argi dagoenez, ea azkenean Eusko Jaurlaritza software librea benetan sustatzen eta erabiltzen hasten den. Bada garaia!

Orain sozialistak daude Euskal Autonomia Erkidegoko (EAE) gobernuan eta beraiei dagokie Eusko Jaurlaritzak software librearen alde egin dezan lortzea. Idoia Mendia sozialista, Eusko Legebiltzarreko parlamentaria izan da orain dela gutxira arte eta, bertan zegoela, behin baino gehiagotan atera du software librearen gaia gobernuari presioa egiteko. Orain, bera da gobernuko kidea eta lehen besteei eskatzen zizkionak betetzeko gai dela erakutsi behar du.

Martxoko hauteskundeen aurretik, SoftwareLibreaNahiDugu.org ekimenekoek lehendakaritzarako hautagai aurkezten zirenei software librearen eta estandar irekien inguruko galdera batzuk egin zizkieten. Alderdi guztiak ezbairik gabe software librearen alde agertu ziren eta, gainera, hauteskundeak irabaziz gero gai honen inguruan emango zituzten urratsak ere idatzi zituzten.

Sozialisten promesak

Demokrazia Hiru Milioiko (D3M) Itziar Lopategik, adibidez, legegintzaldi batean (hau da, lau urteren buruan), erakunde publiko guztietako lanpostuetan software librea erabiltzea eta euskal instituzio publikoek sortutako eduki guztiak lizentzia libreekin argitaratzea agindu zuen. Baina dakizuen bezala, Alderdien Legea dela eta, D3M-k ez zuen hauteskundeetara aurkezterik izan eta PSE-EE (PSOE) dago orain EAEko gobernuan.
Patxi Lópezek ere software librearen alde eta estandar irekien alde zegoela esan zuen argitasun osoz eta, orain, lehendakaria denez gero, bere usteak sendoak direla erakutsi behar du. Izan ere, Patxi Lópezek lehendakari izatea lortzen bazuen, Eusko Jaurlaritzak bere webguneen inguruko kontratazioek estandar irekiak bete zitzaten egingo zuela agindu baitzuen. Era horretan, Patxi Lópezek zioena egia bada, software librea erabiltzen dugunok hemendik aurrera ez dugu arazorik izango erakunde publikoekin harremanetan aritzeko. Beno, bada bere hitza beteko duen ala ez zain gaude software librea erabiltzen dugun ehunka mila euskal herritarrok.

Rubalcaba sozialistak LSSI legearekin eta kanon digitalarekin egin zuen berdina ez egitea espero dugu. Sozialistek, oposizioan zeudenean, LSSI legea zentsuratzailea zela, isun handiegiak ezartzen zituela eta kanon digitala indartzen zuela kritikatzen zuten. Rubalcabak berak LSSI legea ziberespazioko zentsuraren legea deitzen zuen bere kritika gogorrak botatzen zituenean. Behin boterera helduta, esaten zituenak bat-batean ahaztu egin zitzaizkion, antza. Ez hori bakarrik, espainiar sozialistek LSSI legea baino kaltegarriagoa den lege bat bultzatu eta onartu zuten, LMISI legea.

Euskal sozialistek berdin egingo ote duten beldur naiz. Gobernua behin eta berriz kritikatu ostean software librearen alde gehiago ez egiteagatik, behin boterera helduta, beraiek esandako guztiak bat-batean ahaztu eta sudurraren puntan jartzen zaiena egingo ote duten beldur. Oker banago has daitezela behingoz software librea eta estandar irekiak gogoz eta indarrez bultzatzen, hamaika gauza baitaude egiteko. Gainera, aldi berean, egungo krisiari aurre egiten ariko dira.

Argitaraketa: Artikulu hau GARA egunkariko GAUR8 larunbateko gehigarrirako prestatu nuen eta 2009ko ekainaren 5ean argitaratu zen.

Erlaziodun artikuluak:

/ Etiketatua: d3m, gara, gaur8, lmisi, lssi, politika, psoe, software librea

Politika 2.0

2009(e)ko apirilak 11 18:17 / / Txopi

demokrazia digitala
Irudi originala

Testu hau argitaratzen den egunean, Araban, Bizkaian eta Gipuzkoan burututako hauteskundeak igarota egongo dira. Hauteskundeei buruzko datuak eta analisiek, hala ere, jarraituko dute eta aurkeztu ahal izan diren alderdi politikoak Euskal Autonomia Erkidegoko parlamentuko eserlekuak beraien artean banatzen ibiliko dira. Baina hori guztia etorkizuna da niretzat, gaur, testu hau idazten dudan egun hau, hauteskundeen bezperako eguna baita.

Gaur, alderdien kanpainak eten egin dira eta ohi bezala Euskal Herriko zatitxo honetan bizi garen herritarroi hausnarketarako gonbitea luzatu digute. Eta horretan ari naiz. Baina behin pentsatzen hasita, alderdien aukeretatik haratago joan naiz. Alderdien sistema berari buruz hasi naiz hausnartzen.

Alderdien akatsak

Izan ere, gurea ordezkaritzan oinarritutako demokrazia da. Hori, noski, enpresek eta presio lobbyek boterean dauden alderdi politikoengan duten eragina alboratzen badugu da egia (bistan da hierarkiako tontorrean ibilitako politikariak banku eta antzeko enpresa boteretsuetan nola bukatzen duten). Kontua da, ordezkaritza-demokrazia honetan, herritarren ikuspegi, arrazoi eta argumentu zenbatezinak alderdi politiko gutxi batzutan multzokatzen direla, eta hauek, botere osoa dute lau urte luzetan zehar herritar guztien baliabideak kudeatzeko (legedia, garraio eredua, hezkuntza sistema, eta abar), lurralde osoa beraiek egokia ikusten duten bezala zuzenduz. Guk, bitartean, ezer gutxi egin dezakegu. Funtsean, beste lau urte itxaron eta berriz ere aukeren arteko bat hautatu. Argi dago gurea oso sistema mugatua dela; gainera, nire ustez, asko hobe daiteke.

Egungo sistema egokia iruditzen al zaizue? Azaldu dudan bezala, niri ez zait batere egokia iruditzen. Eta ziur nago irakurle asko nirekin ados egongo dela, egungo sistemak akats mordoa dituela ondo baino hobeto erakutsi baitu: politikariek boterea metatzen dute eta horrek ustelkeria sorrarazten du (Irungo Ogasuna); alderdi politikoak beraien artean etengabeko lehian daude eta arazo/erronka garrantzitsu askoren aurrean, adostasuna bilatu beharrean kontrakoa egiten dute, gaiak arerioa erasotzeko erabiliz (Gernikako Estatutua ez betetzea); alderdi bakoitzak hainbat eta hainbat herritar ordezkatzen ditu eta gai zehatz askoren aurrean, bozkatzaileek gai horri buruz benetan zein iritzi duten zehazki ez dakite (Irakeko gerra, AHTren eraikuntza, Abortuaren Legea); batzutan, aipatutako borroka horien ondorioz, eta arrazoi taktikoak argudiatuz, alderdiek hauteskunde kanpainan esandakoaren kontrakoa egiten dute, bozkatu dieten herritarren nahiak salduz (Nafarroako hauteskundeen ondoren PSNk UPNrekin tratua egitea). Luze jarrai genezake ordezkaritza-demokraziak berezkoak dituen hainbat arazo zenbatzen.

Teknologia berriek ematen dituzten aukerak ikusita, gizarte antolaketa eta koordinaketa sistema egokiagoak bilatzeko gero eta aitzakia gutxiago dago

Egungo sistema egokiena iruditzen al zaizue? Niri ez, inola ere ez. Nire ustez, teknologia berriek ematen dituzten aukerak ikusita, gizarte antolaketa eta koordinaketa sistema egokiagoak bilatzeko gero eta aitzakia gutxiago dago.

Gaur egun, herritar gero eta gehiagok telefono mugikorrak erabiltzen dituzte, Interneten nabigatzen dute, foroetan informazioa bilatzen dute eta, noiz edo noiz, parte hartzera ere iristen dira. Eta datozen urteetan joera honek jarraitu egingo du, zalantzarik gabe. Beraz, tresna hauek demokrazia zuzenagoa eraikitzeko egokiak izan daitezke, egungo sistemak eskaintzen ez dituen ezaugarriak baitituzte: bat-batekotasuna, nahi beste bozketa era erosoan egiteko aukera, iritziak emateko eta partekatzeko aukera, adostasuna bilatzeko tresnak, gauden lekutik mugitu gabe parte hartzeko aukera, eta abar. Baina nola uztartu ezaugarri berritzaile horiek politika egiteko era berri batekin?

Hiru adibide berritzaile

Aldaketa hau egitea zaila dela pentsa daiteke, utopia hutsa ere izan daiteke askorentzat. Baina historiak erakusten duen bezala, aldaketa gehienak urrats txikien bitartez gauzatzen dira. Teknologia berriak, Internet sozialarekin eta sare sozialekin lotuta dagoen Web 2.0 delakoaren laguntzaz, gure artean erlazionatzeko era aldatzen hasi dira jada. Gutxi-gutxika lanpostu asko eraldatzen doaz, baita hedabideak, ikasteko erak, aisia eta noski, politika egiteko era ere.

Adibide bezala, urte honetako urtarrilean Ezker Batua-Berdeak koalizioak bere hauteskunde programa osatzeko erabili duen bide berritzailea aipa daiteke. Euskal alderdi politiko honek, Zabaldu.com webguneak albisteak elkarbanatzeko erabiltzen duen tresna berdina erabili zuen alderdiarentzako garrantzitsuenak izan zitezkeen arazoak/erronkak aukeratzeko. Beraz, edonork zuen aukera proposatutako gai bati buruz bere iritzia emateko, bozkatzeko eta baita norbere gaiak proposatzeko ere. Ekimen hau oso interesgarria iruditzen zait, sakondu beharrekoa, alderdiko bozkatzaileei betiko bozka mutua emateaz gain, edukiak zehazten laguntzeko aukera ematen baitie.

Partido de Internet alderdia ere aipatzeko modukoa da; izan ere, bere helburua Estatu espainoleko Legebiltzarrean alderdiak hartuko dituen erabaki guztiak bozkatzaileen iritzien arabera automatikoki kalkulatzea da. Horretarako, bozkatzaileek beraien arteko sareak sor ditzakete eta gai zehatzak bozkatuko dituzten ordezkariak ere ezar ditzakete. Beraz, teknologia berrien bitartez, alderdi politiko honek guk nahi dugun ordezkaritza maila eskainiko digu; hala, bozketa guztietan parte hartzen badugu, demokraziarik zuzenenera helduko gara.

2005hiritarrok.net webgunean adibidez, ondoko herriek hartu dute parte: Basauri, Hernani, Laudio, Sopela, Sestao, Oiartzun, Bakio, Bermeo eta Ermua

Udal mailan ere ari dira egiten era honetako saiakerak. ~~2005hiritarrok.net~~ ciudadanos2010.net webgunean adibidez, ondoko herriek hartu dute parte: Basauri, Hernani, Laudio, Sopela, Sestao, Oiartzun, Bakio, Bermeo eta Ermua. Laster Agurain ere batuko da. Bertan, herri bakoitzeko herritarrek Udalari proposamenak egiteko aukera dute eta besteek iruzkinak egin eta proposamenak bozkatzen dituzte, denen artean atxikimendu gehien dituzten proposamenak hautatuz. Herritarrak arduratzen dituzten gaiak nolabait ezagunak egiten zaizkigu: Sopelan autoentzako TAOri buruzko kexak, Basaurin euskara planari buruzko eskaerak, Laudion kiroldegiaren erabilerari buruzko galderak, eta abar. Noski, Udalak gero arazo eta erronka horiei bidea eman behar die, herritarrek bide tradizionalak erabili balituzte bezala.

Politikaren eraldaketa

Hiru ekimen hauek baliagarriak badira ere, hasiera besterik ez dira. Wikipediak edukiak adosteko duen sistema, Zabalduk albiste interesgarrienak aukeratzeko duen sistema (karma deitzen den adierazle bat erabiltzen duena), eta beste webgune batzuk beraien esparruan demokrazia zuzenagoak gauzatzeko erabiltzen dituzten sistemak errealitate bat dira dagoeneko, ondo dabiltzala frogatu dute eta denbora kontua izan beharko luke sistema hauen abantailak ere politika arruntera heltzea.

Herritar guztien eskubideak kontutan dituen gizarte batek beti mantendu behar du gutxieneko ordezkaritza maila egoki bat

Horretarako, teknologia berrien inguruko heziketa indartzea, herrietan doako wifi konexioak eskaintzea eta antzeko ekimenak aurrera ateratzea dira e-demokrazia sustatzeko era egokiak. Baina kontuz, ez gaitzala berritasunak itsutu. Tresna hauen guztien erabilera areagotzeak fruitu bikainak eman ditzake, baina demokrazia zuzena utopia bat dela ez dugu ahaztu behar. Herritar guztien eskubideak kontutan dituen gizarte batek beti mantendu behar du gutxieneko ordezkaritza maila egoki bat: haurrentzako, zaharrentzako, gaixoentzako, elbarrientzako eta abar.

Aukera dugu boterea, hein handi batean behintzat, herritarrengana itzul dadin, bakoitzak nahi duen parte hartze maila eskuratuz

Politika 2.0 delakoak alderdi politikoen sistema alde batera uzten lagun gaitzake, horrekin batera sistema honek berezkoak dituen arazo asko ekidinez (botere metaketa, herritarren parte hartze oso murriztua, gizartearen arazo/erronka desberdinak trukeko txanpon soilak bihurtzea, etab.). Aukera dugu boterea, hein handi batean behintzat, herritarrengana itzul dadin, bakoitzak nahi duen parte hartze maila eskuratuz. Horrela, politikaren protagonismoa alderdietatik eta politikari profesionaletatik kendu eta herritarroi eta benetan arduratzen gaituzten arazo eta erronkei emango diogu. Helburu paregabeak dira horiek, baina bidea asko landu beharra dago oraindik.

Zailtasun berriak aurkituko ditugu eta orain dauzkagun akatsak sistema berrian errepika ez daitezen adi ibili beharko dugu. Arazoak begien bistan daude: teknologia berrien erabilera herritar askorentzat oraindik oztopo bat izatea, gizakiak aldaketarako duen berezko erresistentzia, politikari profesionalen ordez elite intelektual batek eragin handiegia izatea, enpresek eta presio lobbyek egungo sistema kontrolatzen duten bezala sistema berri hori ere kontrolatzeko era aurkitzen saiatzea. Baina gizarteko beste atal askotan egiten ari garen bezala, politikagintzan ere teknologia berriek eskaintzen dizkiguten aukera paregabeetatik onurak nola aurkitu zehazten saiatu behar dugu. Demokrazia maila hobeagoa lortzeko aukera dugu eta, ezbairik gabe, merezi du lan horretan aritzeak.

Argitaraketa: Artikulu hau GARA egunkariko GAUR8 larunbateko gehigarrirako prestatu dut eta 2009ko martxoaren 7an argitaratu da.

Aldaketa (2010/06/15 ): 2005hiritarrok.net domeinua desagertu dela dirudi eta bere ordez ciudadanos2010.net webgunera jarri dut esteka.

Erlaziodun artikuluak:

Hauteskundeak Interneten

Beste hizkuntzak: castellano

/ Etiketatua: alderdi politikoak, ezker batua, gara, gaur8, partidodeinternet, politika, politika 2.0, psn, upn, web 2.0

Hauteskundeak Interneten

2009(e)ko apirilak 11 15:28 / / Txopi

parlamentua
Irudi originala

Hauteskundeak heldu zaizkigu Euskal Herriko parte batera. Eta beti bezala, bozgorailuak deika ditugu kaleetan, mitinak enparantzetan, alderdien mezuak telebistetan, gure izenean heltzen diren bozak etxeko postontzian, kartelak kaleko hormetan, mota guztietako elkarrizketak eta eztabaidak egunkari, irrati eta telebistetan, eta abar. Aurten ere bai, betiko lez. Interneten ere, alderdi politikoak gora, hauteskunde kanpaina behera, zein garaitan gauden gogorarazten diguten hamaika seinale aurkitzen ditugu han eta hemen. Aurten ere bai, baina ez betiko lez, baizik eta gehiago. Askoz gehiago.

Obama aitzindari

Barack Obamak irabazi berri dituen hauteskundeetan, Internet erabiltzeko izan duen moduak emaitzetan pisua izan duela diote adituek. Kanpainak iraun zuen bitartean, astero bideo berri bat igotzen zuen Youtube webgune ezagunean. Bere hautagaitzaren webgunean Creative Commons sortako lizentzia aske bat jarri zuen, nahi zuenak edukiak kopia eta zabal zitzan. Ez hori bakarrik, Ameriketako Estatu Batuetako presidente bilakatu eta berehala, Etxe Zuriko webgunean ere lizentzia aske berdina ezarri du. Teknologia berriak eta Interneteko sare sozialak bere onurarako inork baino hobeto erabiltzen jakin duela diote denek, eta Obamak boto gehiago lortzeko bidea zein den erakutsi ondoren, espero zitekeen bezala, euskal alderdi politikoek sarea inoiz baino gehiago erabiltzen hari dira hauteskunde hauetan.

Youtubera mitin eta hitzaldietako bideoak igotzen dituzte, Flickr-en ekitaldietako argazkiak jartzen dituzte, Facebooken alderdi politikoaren taldea sortu eta ekitaldi guztien berri ematen dute

Hori horrela dela konturatzeko, euskal alderdi politikoen webguneetatik itzuli bat egitea besterik ez dago. Urte dezente dira euskal alderdi politikoak Interneten daudela, hori ez da ahaztu behar, baina hauteskunde hauetan tresna eta osagai berriak erabiltzera ausartu dira, batere beldurrik gabe eta guztiak batera gainera. Ia guztiek, Youtubera mitin eta hitzaldietako bideoak igotzen dituzte, Flickr-en ekitaldietako argazkiak jartzen dituzte, Facebooken alderdi politikoaren taldea sortu eta ekitaldi guztien berri ematen dute, Tuentin gauza bera, eta abar.

Alderdi askotan, politikariek idazten dituzten blogetako edukiak RSS bitartez biltzen dituzte, bisitariak alderdiari buruz eta kanpainari buruz ondo informatuta egon daitezen. Horretaz gain, posta elektroniko bidez jasotzen den ohiko buletinean izena emateko aukera ematen dute. Errepikakorra ez izatearren, nik ezberdintasunak errepasatuko ditut batik bat.

Euskal alderdiak

PSE-EE alderdiko Patxi Lopez hautagaia, adibidez, blogaria da. Noizbehinka bere blogeko iruzkinak erantzuten ditu eta beste blog batzutan ere egiten ditu iruzkinak. Twitter ere erabiltzen du eta mikroblogineko tresna honekin, bere ziberjarraitzaileen elkarrizketa bat erantzun du orain dela egun gutxi. Horretaz aparte, PSE-EEk hauteskunde hautarako sortu duen webgunean, “aldaketara batzeko” aukera ematen dio nahi duen orori Obamak erabilitako lelo bera baliatuz; izena eta herria sartu ondoren, alderdiko jarraitzaile guztiak mapa batean erakusten dira.

Redparaelcambio.org webgunean PSE-EEko jarraitzaileak beraien izena eta herria emanez “aldaketara batu” daitezke
Irudi originala

Alderdi Popularrak (PP) bere hautagaiari Basagoiti 2.0 deitzen dio alderdiko webgunean. Bertan, ohiko bideoez gain, Antonio Basagoitik berak bere argazki kamera txikiarekin ateratako bideo batzuk ere jarri dituzte. Antza, bideoblogaria bihurtu nahi dute beren hautagaia.

EAJko Juan Jose Ibarretxek ez du zuzenean edukirik igotzen Internetera, baina hauteskunde kanpainako jarraipen zehatza egin nahi dutenentzat, uneoro non dagoen eta zer egiten ari den azaltzen du bere webgunean. Ibarretxeren GPSa deitzen den orrialdean, zein herritan lo egiten duen, ekitaldiak non burutzen dituen eta autoz nondik nora doan erakusten duen mapa bat agertzen da. Hurrengo ekitaldia non izango den ere erakusten du orrialde bitxi honek.

Ibarretxeren GPSa Ibarretxe.com webgunean EAJ-PNVko hautagaiak kanpainan egiten duen guztia zuzenean erakusten da
Irudi originala

D3M hautes elkarteak, hauteskunde kanpaina burutzeko aukera gutxi izango zituela jakinda edo, oso txikiak (eta askorentzat ezezagunak) diren alderdi politikoek egiten dutena egin du; alegia, Internet oso gutxi erabili du. Webgune sinple bat, hainbat bideo eta blog bat (iruzkinik egiteko aukerarik ematen ez duena). Hori bai, eduki guztiak Creative Commons sortako lizentzia aske batekin argitaratu ditu. Eta Estatu espainiarrak bere hautagaitza legez kanpokotzat jo zuenean, aurkezten diren hiru herrialdetako boto-txartelak webgunean jarri zituen eskuragarri. Hortaz, Internet gehiegi erabili ez badute ere, ondo egokitu dute dituzten beharretara.

Eusko Alkartasunako (EA) eta Aralarreko webguneek kanpaina jarraitzeko ohiko aukerak ematen dituzte: egitarauak, ekitaldietako bideoak, alderdiko blogarien jarraipenak, eta abar.

Ezker Batua-Berdeak (EB-B) koalizioren Interneteko kanpainak, bere aldetik, berezitasun bat izan du. Orain dela hilabete bat, parte hartu nahi zuen orori, alderdiko hauteskunde programa web 2.0 motako tresna batekin zehazten laguntzeko aukera eman zioten; bakoitzak nahi zituen gaiak proposatzen zituen eta parte hartzaile guztiek izan zuten proposamenak eztabaidatu eta bozkatzeko aukera. Politika 2.0 hitza gero eta gehiago entzuten den garaiotan, modako sare sozialak erabili eta mapa ikusgarriak erakusteaz aparte, hauteskunde hauei begira euskal alderdi politikoek burutu dituzten ekimenen artean interesgarrienetakoa iruditzen zait.

Herri ekimenak

Baina teknologia berriek eta Internetek ematen dituzten aukerak ez dituzte politikariek bakarrik erabili. Izan ere, hauteskunde hauetan, herritarrak ere gerturatu dira politikariengana tresna hauen bitartez

Baina teknologia berriek eta Internetek ematen dituzten aukerak ez dituzte politikariek bakarrik erabili. Izan ere, hauteskunde hauetan, herritarrak ere gerturatu dira politikariengana tresna hauen bitartez. Politika 2.0 deitzen den euskal herritar blogari talde bateko kideek, alderdi politiko bakoitzari egin nahi zizkioten galderak adostu zituen; ondoren, erantzunak bideoz grabatzeko hitzordua egin zuten alderdietako kideekin. Azken asteotan Mikel Arana (EB-B), Rafa Larreina (EA), Idoia Mendia (PSE-EE), Izaskun Bilbao (EAJ-PNV), Josu Murgia (Aralar) eta Borja Semperrekin (PP) izan dira. Hurrengo helbidean ikus daitezke erantzunak: politika20.blip.tv.

Eusko Jaurlaritzak software askearen aldeko apustua egin dezan sinadura bilketa bat burutu duen beste euskal herritar talde bat, berriz, politikoengana zuzendu da eta gaiaren inguruan duten iritzia eta helburuak zehatz azaltzeko eskatu die lehendakaritzarako hautagaiei. Itziar Lopategi (D3M), Unai Ziarreta (EA), Javier Madrazo (EB-B) eta Patxi Lopezen (PSE-EE) erantzunak biltzen dituen txostena helbide honetan eskura daiteke: softwarelibreanahidugu.org.

Politikari gehienek, zoritxarrez, Internet telebista bezalako norabide bakarreko medioa balitz bezala erabiltzen dutez

Hauteskunde hauetan euskal alderdi politikoek Internet inoiz baino gehiago erabili dutela argi dago. Gehiago eta era gehiagotan. Bideo mordoa igotzeaz gain, Facebook eta Tuenti bezalako sare sozialen erabilerak nabarmen egin du gora. Batzuk eta besteek blog berri nahikotxo ere sortu dituzte, baina, hauteskundeak iragandakoan, maiz gertatzen den bezala, gehienak bertan behera utziko dituztelakoan nago.

Eta zergatik? Ba politikari gehienek, zoritxarrez, Internet telebista bezalako norabide bakarreko medioa balitz bezala erabiltzen dutelako. Hedabide arruntekin nahiko hauteskunde propaganda jasoko ez bagenu bezala, webguneak eta Interneteko sare sozialak guri bideo, testu eta mezu gehiago igortzeko erabiltzen dituzte. Oso tresna modernoak erabiltzen dituzte bai, baina betiko berdina egiteko. Propaganda 2.0 honek geunden lekura besterik eramango ez gaituela ulertu beharra daukagu.

Garrantzitsua da alderdi politikoak ekimen berritzaileak saiatzera bultzatzea. Eta baita guk geuk, herritarrok, teknologia berrien eta Interneten bitartez, demokrazia zuzena lantzeko ekimenak aurrera eramatea

Gizartearen norabidea markatu nahian, alderdi politikoak etengabe ari dira herritarrei gauzak esaten, baina inoiz ez dute jendeak dioena entzuten. Internet, beste hedabideak ez bezala, norabide anitzeko hedabidea da eta, ondorioz, bere erabileran sakontzen jarraituz gero, konturatu gabe ere, demokrazia zuzenago batera heltzeko bidea jorratzen joango da gizarte osoa (murgilduta gauden demokrazia ordezkatzaileko politikariak barne). Azken finean, Internet gure asmakizuna da eta gure onurarako sortu eta garatzen dugu.

Horiek horrela, garrantzitsua da alderdi politikoak ekimen berritzaileak saiatzera bultzatzea. Eta baita guk geuk, herritarrok, teknologia berrien eta Interneten bitartez, demokrazia zuzena lantzeko ekimenak aurrera eramatea.

Gizarte 2.0rik gabe ez da politika 2.0rik egongo. Alderdi aldaketa baino, sistema aldaketa eragin dezagun!

Argitaraketa: Artikulu hau GARA egunkariko GAUR8 larunbateko gehigarrirako prestatu dut eta 2009ko otsailaren 21ean argitaratu da.

/ Etiketatua: alderdi politikoak, aralar, d3m, ea, eaj, ezker batua, gara, gaur8, hauteskundeak, politika, politika 2.0, pp, psoe, web 2.0

Jardunaldi hacktibista Bilbon

2008(e)ko apirilak 22 17:45 / / Txopi

Larunbat honetan beste hitzaldi bat emango dut jabetza intelektualaren inguruan. Jardunaldi hauen barnean burutuko dugun jardueretako bat da.

hitzaldi bat
Irudi originala

Hona hemen jardunaldietako deialdi osoa:

Teknologian eta bere eragin politiko-sozialetan interesaturik gauden pertsona batzuk, datorren larunbatean (apirilak 26), Bilbon, bilera bat ospatuko dugu.

Topaketa hau antolatzera bultzatu gaituena zera da, software askearekin zuzenki edo zeharka erlazionaturik dauden talde asko geldirik daudela, eta baita teknologia berrien alde politikoetan sakondu nahi duten pertsona asko isolatuak daudela. Egoera honek, talde-ikasketa eta talde-esperimentazio ekimenak sortzea oztopatu dezakeela uste dugu. Horregatik, deialdi orokor bat egiten dugu: interesaturik zaudeten guztiok, zatozte jardunaldira, denok leku berdinean bildu gaitezen, ezagutu gaitezen eta elkarrekin lan egiteko aukerei buruz hitz egin dezagun.

NOR

Espreski gonbidatzen ditugun taldeak:

e-ghost (bilbo)
glub (bizkaia)
glugi (gipuzkoa)
ether (donostia)
gisa-elkartea (errenteria)
gula-zale (araba)
grulin (nafarroa)
itsas (eae)
metabolik (bilbo)
reciclanet (bilbo)
amatau-tv (bilbo)
hacklab-getxo (getxo)
hackelarre (gernika)
hacking-badakigu (bermeo)
hackresi (iruñea)
netlach (bilbo)
aprendices-bloggers (bilbo)
librezale (eh)
euskalgnu (eh)
indymedia-eh (eh)
compartir-es-bueno (anitzak)
hckrs (anitzak)
hacklabs (anitzak)
hackmeeting (anitzak)

Jardunaldian parte hartzen interesaturik egon daitekeen beste edozein talde eta beste edozein pertsona ere GONBIDATUTA DAGO! Zure lagun edo ezagunen bat bilera honetan parte hartu nahi izan dezakeela uste baduzu, luzatu iezaiozu mesedez deialdi hau.

ZER

Helburua, gai hauen inguruan mugitzen diren pertsona guztiak biltzea da: software askea, hacking-a, birusak, segurtasuna, programazioa, software patenteak, netstrike-ak, kriptografia, e-anonimotasuna, RFID, wireless sareak, sare sozialak, copyleft-a, jabetza intelektuala, kanon digitala, creative commons, ziberreskubideak, artibismoa, net-art, adimen artifiziala, kultura librea, mediaktibismoa, etab. Denok elkartu ondoren eta pizkat ezagutzen garenean, batzen eta desberdintzen gaituzten gauzei buruz hitz egiteko aukera izango dugu, eta oraindik hobeto, elkarrekin lan egiteko aukera desberdinei buruz. Ziur bildutako guztion artean, ilusioa eragingo gaituzten proiektuak asmatuko ditugula. Agian ateratako ideiaren bat hurrengo egunean martxan jarri nahi izango dugu, nork daki

Guzti honetaz aparte, Bilbo inguruetako pertsonek talde lokal bat eratzeko gai izatea eta eratzeko gogoa izatea espero dugu. Parte hartzeko prest gaudenon artean erabakiko genituzke taldearen formatua, izaera eta beste guztia. Izan ere, gaur egun, Bilbo eta inguruetan hacktibismo alorrean hutsune bat bait dago.

Proposatzen dizuegun egitaraua ondokoa da:

10:00 Hitzaldia: “Jabetza intelektuala. Software asketik eduki askeetara”
10:45 Hitzaldia: “Ziberaktibismoa: hacktibismoa sarean”
11:30 Atsedena
12:00 Hitzaldia: “Web 2.0, ¿benetan da web soziala?”
13:00 Bildutakoen aurkezpentxo informala (taldeena eta nahi duten pertsonena)
14:00 Bazkaria
15:30 Hacker eta hacktibismoari buruzko dokumental baten emanaldia eta bere inguruko eztabaida txiki bat
17:00 Asanblada
19:30 Jardunaldiaren amaiera (jarraian poteo bat Alde Zaharretik)

Arratsaldeko bileran, interesa dugun guztiok, motibatzen gaituzten gauzei buruz hitz egiteko aukera izango dugu, eta baita beste hainbat ideia, proposamen, ekimen, proiektu eta ekintzei buruz ere. Adibidez, galdera hauei erantzuten saiatu gintezke: Zer nahi dugu atera hemendik? Zeintzu indar dauzkagu? Zenbateko dedikazioa emateko prest gaude? Zeren alde gaude? Zeren aurka gaude? Norekin arituko gara elkarlanean? Noren aurka aritu gara? Nolako jarduerak burutu nahi genituzke? Nolako koordinazio/antolaketa maila nahi genuke mantendu? Zein motatako taldea sortu dezakegu Bilbon?

NON

Mujeres del Mundo – Munduko Emakumeak elkarteko lokalean:

Fika kalea 5, beheko solairua (sarrera barruko patioaren ondoan)
Bilbo (Alde Zaharra)
Telefonoa: 944005417

Gertuen dagoen metro geltokia Alde Zaharra da eta bertan Unamuno irteera.
Lokala Iturribide kaletik oso gertu dago (aldapa hasten denean, eskuinera).

NOIZ

2008ko apirilaren 26an, larunbata.
Goiz eta arratsalde.

ZENBAT

Jardunaldietan parte hartzea askea eta doakoa da.
Bazkaria bakoitzaren kontura: ideia Alde Zaharreko jatetxe eta tabernetara joatea da.
Prestatutako janaria ekartzen duenak lokalean bazkaldu ahal izango du.

Jardunaldi hau interesgarria iruditzea espero dugu eta baita deitu dugun jende sortzaile, geldiezin eta sutsuarekin egunpasa egiten animatzea ere. Bilduko garen guztiok elkar ezagutzeko aukera bikaina dela uste dugu eta baita elkarnerako moduak aurkitzeko ere. Dena irekita dago…

“Etorkizuna interesatzen zait, bizitzeko geratzen zaidan guztia leku horretan biziko bait dut.” – Woody Allen

Eguneraketa (2008/05/27): Jardunaldi hacktibista ospatu ondoren, Julenek eta M@k-ek egindako kronikenganako esteka gehitzen dut. Jabetza intelektualaren hitzaldian erabili nuen aurkezpena hau izan zen:

20080426SoftwareLibreContenidosLibres.pdf (3,2 MB)

20080426SoftwareLibreContenidosLibres.odp (4,9 MB)

txipiri esker, hitzaldiko audioa ere eskuragarri dago:

20080426SoftwareLibreContenidosLibres.ogg (68 MB)

Jardunaldiko material guztiak txipiren lekuan eskuragarri daude dagoeneko.

Beste hizkuntzak: castellano

/ Etiketatua: bilbo, deialdia, hacktibismoa, politika

Tag Archives: Politika

Giza eraikuntza era berriak